E FOLMJA E KASTRATIT

Ky studim hyn në kuadrin e studimeve të para dialektologike për të folmet e gegërishtes veriperëndimore. Synon të paraqesë tiparet themelore të sistemit fonetik, gramatikor dhe leksikor të njërës nga të folmet kryesore të Malesisë, që njihet me emrin e hershëm Kastrati. Ka tipare ruajtëse në fonetikë, morfologji e në leksik, si dhe risi e ndikime nga gjuha letrare dhe nga e folmja e Shkodrës.

Me emrin Kastrat njihet një zonë mjaft e gjerë e Malësisë së Madhe, që ndodhet në pjesën jugperëndimore të saj. E folmja e Kastratit për herë të parë bëhet objekt i një vëzhgimi dialektor.

Në këtë punim kemi pasur si qëllim të bëjmë përshkrimin diferencues të së folmes, duke bërë, aty këtu, krahasime me të folme të tjera të anës veripërendimore.

E folmja e Kastratit hyn në grupin e të folmeve të Malësisë së Madhe, të cilat, siç dihet, qëndrojnë shumë afër njëra-tjetrës dhe kanë disa veçori specifike të ndryshme nga të folmet e tjera veripërendimore. Kësisoj, disa veçori, që në këtë punim theksohen vetëm për Kastratin, në fakt i ka mbarë Malësia e Madhe.

Ky punim u paraqit, së pari, si temë diplome nga Gjovalin Shkurtaj, në qershor të vitit 1966 me titullin «Vëzhgime rreth veçorive fonetike e morfologjike të së folmes së Kastratit».