Mbretëreshë Teuta e Iliris‪ë‬

Porta kryesore është e ndërtuar në të djathtë të skenës dhe para saj bëjnë roje dy ushtarë të Shpurës me përkrenare në kokë dhe heshtat e kryqëzuara. Flakadanët me dritën e tyre të zbehtë të japin përshtypjen se është buzëmbrëmje vonë. Përmes bedenave vërehet dielli teksa perëndon. Tri zana futen duke kërcyer dhe formojnë në qendër të skenës një kor. Më e gjata është një vajzë me flokë të verdhë dhe sy të kaltër. Në duar mban një kupë kristali bosh. E dyta është një vajzë brune me flokët e bëra gërshet, e cila mban në duar një bucelë të mbushur me verë. E treta, më e shkurtër nga të parat është krejtësisht tullace. Në gisht ka vënë një unazë të stërmadhe floriri me një diamant në formën e kokës së gjarpërit. Të trija janë të veshura me dantella të mëndafshta dhe të tejdukshme. Zanat qëndrojnë para dy rojeve të Shpurës dhe fillojnë të kërcejnë, duke iu ledhatuar dy ushtarëve që ende qëndrojnë të ngrirë në pozicionin e tyre luftarak.